NAGA CITY– Piglinaw kan mismong Regional Director kan Department of Social Welfare and Development (DSWD)-Bicol na bako siya an nasa likod kan suboot mga apod na nareresibe kan nagkapirang opisina sa nasyon na naghahagad pabor.
Ini makalihis na maglakop an pangaran ni DSWD Bicol Regional Director Arnel Garcia huli sa mga apod kaini na naresibe kan nagkapirang personahes kan DSWD sa nasyon na naghahagad nin load asin catering services.
Sa entrevista kan Bombo Radyo Naga ki Garcia, sinaysay kaini na nabigla na sana siya kan mag-apod saiya an haralangkaw na opisyales kan DSWD hale sa Quezon Province asin Cebu tanganing kumpiraron kun siya an taong naghahagad nin load na may kantidad na P2500 asin nagpapa-preparar nin catering services.
Sigun ki Garcia, pig-gagamit sana an saiyang pangaran huli ta bistado suboot siya sa manlaen-laen na parte kan nasyon huli sa mga pigtutukawan na position.
Sa ngunyan, uminabot na sa Quezon Province, Bacolod, Palawan asin Mindoro an nasambitan nang modus gamit an saiyang pangaran.
Mientrastanto, pigreport na sa kapulisan asin sa National Telecommunications Commission an nangyari magin an numero na pig-gagamit kan dae pa nabibisto na indibidwal.
Sa tabang kan Bombo Radyo, nangapodan an direktor sa publiko asin sa mga kabisto kaini na mag-ingat asin dae basta magpaloko sa iligal na transaksyon.
