NAGA CITY – Nagtutubod an mismong kapitan kan Barangay Beberon, San Fernando, Camarines Sur na mistaken identity sana an nangyaring pangbabadil sa saro sa saiyang residente na si Virgilio Revilla.
Sa entrevista kan Bombo Radyo Naga ki Kap Larry Mateo, sinaysay kaini na sarong marahay na tao asin mayong kaiwal sa lugar si Revilla.
Apwera digdi, aktibo man soboot ini sa barangay asin sa mga programa o proyekto kan munisipyo.
Sigon sa opisyal, posibleng ibang tao an target kan gunman asin nasala sana an mga ini kan si Revilla an pinaputukan.
Sigon ki Mateo, nakikipagkoordinar naman sinda sa kapulisan para sa marikas na pagresolbar kan kaso.
Sa ngunian, nagpaparahay pa si Revilla makalihis magsapo nin tama nin bala sa saiyang tikab alagad maswerteng dae napuruhan.
