Nagpuon na an mas mahigot na paghahanap kan Presidential Anti-Organized Crime Commission (PAOCC) asin Bureau of Immigration (BI) sa gabos nin illegal workers kan Philippine Offshore Gaming Operators (POGO).
Magpuon kaya ngunyan na aldaw ay mayo nang pigtutugutan na POGO na makapag-operate sa sain mang parte nin nasyon.
Segun ki PAOCC executive director Undersecretary Gilbert Cruz, may mga pig-aasikaso na sinda gikan sa mga suplong dapit sa nagkapirang dayuhang dae nag-downgrade nin saindang visa.
An mga ini soboot ay patagong nagpapadalagan nin saradit na pasugalan asin mga kapararehas na aktibidad.
Para ki Cruz, mas marikas na para sa saindang matukoy ngunyan an mga nasa illegal operations, huli sa gabos na mga POGO ay tulos man na pigmarkahan na bawal gikan sa deadline kan nakalihis na aldaw nin Martes kan gobyerno.
Segun man ki Bureau of Immigration (BI) spokesperson Dana Sandoval, tulos nindang ibubugtak sa deportation proceedings an sisay man na dayuhan na imbelto sa POGO. Bastante na soboot an panahong pigtalaan tangani na magkusa ang mga ini na mag-downgrade kan visa gikan sa working class pasiring sa pagigin regular na byahero.
An mga kusang naghali ay pwede pang makabalik, mantang an madadakop na may illegal papers ay itatala sa black list asin dae na makakabalik sa nasyon.
