NAGA CITY– Gadan an sarong paraoma makalihis pagbabadilon kan armadong kalalakihan sa Purok 2, Barangay Magsaysay, Capalonga, Camarines Norte.
Binisto an biktima na si Alberto Casulla, kinakarkulong nasa 50-anyos.
Sa nakuang impormasyon kan Bombo Radyo Naga sa Camarines Norte Police Provincial Office (CNPPO), napag-araman na mantang lunad kan sarong tricycle si Casulla kaibanan an duwang amigo kaini kan biglang magharang an tolong lalaki na armado nin haralangkaw na kalibre nin badil.
Tulos na kinua kan mga suspek an wallet asin cellphones kan duwang amigo kan biktima antes sinugong maglukso sa ampas.
Makalihis an nagkapirang minuto, nagdangog na sana an magkakasunod na putok hasta sa bumulagta an lawas ni Casulla.
Sa ngunian, nagpapadagos pa an imbestigasyon kan mga otoridad dapit sa nasambitan ng insidente mantang pinaghahanap naman an mga suspek na nasa likod kan nasambitan ng panggagadan.
