Gadan an sarong paratukdo makalihis na mabanggaan nin awto mantang nagbabalyo sa pedestrian lane sa kalabaan kan MT Villanueva Ave, Liboton, sa Ciudad nin Naga amay kan Setyembre 20.
Sa entrevista kan Bombo Radyo Naga ki PCPT. Sarah San Buenaventura – Officer-In-Charge, Naga City Police Station 3, sinaysay kaini na sa ipigsagibo na imbestigasyon kan Naga City Police Office Station 3, napag-araman na an biktima binabagtas kaini an pedestrian lane kan mabangga kan kasabatan na behikulo.
Basado sa inisyal na imbestigasyon, nag-uulay an biktima sa cellphone mantang nagbabalyo sa tinampo.
Segun sa pulis, mayo nin indikasyon na nag-inom nin arak o nasa impluwensya nin iligal na droga an driver kan lunadan.
Posibleng marikas an pagpadalagan kan driver huli ta mahiwas an tinampo asin dikit sana an mga behikulo asin tawo sa lugar kan mangyari an insidente.
Dae man nagdulag an driver asin napapaatubang sa kasong may koneksyon sa insidente.
Pigpreparar na kan mga otoridad an pagsangat nin kaso kontra sa suspechado huli sa reckless imprudence na nagresulta sa homicide, mientras na pighahalat an death certificate kan biktima bilang saro sa mga dokumentong kinakaipuhan sa pagsangat kan kaso.
Mientrastanto, nagpagirumdom man an si San Buenaventura sa mga motorista na mag-ingat urog na sa amay na aga, dawa diit sana an lunadan sa tinampo.
Pinagirumdom man an mga pedestrian na gamiton an pedestrian lane asin siguraduhon na maghiling sa wala asin too antes magbalyo.
Dawa importante an paggamit kan pedestrian lane, sinabi man kan kaini na dapat likayan an paggamit nin cellphone mantang nagbabalyo tanganing magdanay na nakatutok sa tinampo.
Segun ki San Buenaventura, maliwanag an lugar asin igwa man nin traffic light sa haraning parte kan Peñafrancia Avenue.
Sa ngonian padagos an imbestigasyon kan mga otoridad dapit sa insidente.
