AMINADO si President Ferdinand R. Marcos Jr. na kadakol pa an kaipuhan na gibohon tanganing maisakatuparan an mga programa asin mga pangakong bnutasan kan saiyang administrasyon sa saiyang ikalimang State of the Nation Address o SONA.
Sa saiyang vlog na iniluwas kan Sabado, Agosto 8, sinabi ni Marcos na mas labi pa sa sarong talumpati an SONA huli ta kaipuhan pa ining sunudan nin konkretong mga lakdang tanganing masimbagan an mga pangangaipohan kan mga Pilipino.
Ipigheras man kan Presidente an halawig na preparasyon para sa saiyang SONA, na nagpoon pirang semana bago an saiyang talumpati.Kabali digdi an pangangalap nin datos, pagsusuri sa mga naging development asin pagrepaso sa mga programang ipapadagos kan gobyerno.
Sinabi ni Marcos na pirang beses man inayos an daloy kan talumpati asin personal niyang nirebisa an mga tataramon tanganing magin mas angay sa pagtaram kaysa sa pagbasa.Inako kan Presidente na padagos siyang naggibo nin mga pagbabago sagkod sa mismong aldaw kan SONA, kabali an mga adjustment habang binibigkas an talumpati.
Sigun digdi, kinaipuhan na palip[uton an enot na draft huli ta halaba ining maray asin may ibang mga isyu na dai na naibali, na puwedeng matukar sa saiyang huring SONA.
Apwera sa paghahanda kan talumpati, tinawan-doon ni Marcos an importansya kan pag-utob sa mga isyung ipinapaabot kan mga namamanwaan.Kabali sa mga tinukoy niyang programa an mga lakdang kontra gutom, distribusyon nin bagas sa mga pamilyang nangangaipuhan, asin feeding programs para sa mga estudyante.
Binanggit man niya an Yaman ng Kalusugan Program o YAKAP, na nagtatao nin konsultasyon asin mga medisina sa mga estudyante, magurang asin paratukdo.Sigun ki Marcos, pinalawak an tabang kan PhilHealth para sa mga pasyenteng nagsasairarom sa dialysis, pati na an mga programa para sa cancer, HIV/AIDS asin mental health.
Ipinunto man kan Presidente an Zero Balance Billing policy sa mga ospital kan Department of Health asin an pagtanggal kan value-added tax sa ibang mga medisina.Sinabi kan Pangulo na padagos na mamamati an saiyang administrasyon sa mga agrangay kan publiko asin sisimbagan an mga problema na kaya pang aksyunan kan gobyerno.
