Nakatalaang magbiyahe si Presidente Ferdinand Marcos Jr. pasiring India para sa limang aldaw na State Visit puon August 4 hasta 8, 2025. Ini an basado sa nagin imbistasyon ni Indian Prime Minister Narendra Modi.
Sigun sa Presidential Communications Office, makikipag-ulay an Presidente sa mga lider kan India sa New Delhi, asin mapasiring man sa Bangalore para sa serye kan business engagements tanganing pakusugon an koneksiyon kan duwang nasyon sa ladangan kan kalakalan asin ekonomiya.
Makikipaghilingan man si Presidente Marcos sa Filipino community sa New Delhi komo parte kan saiyang opisyal na schedule.
Ini an enot na State Visit kan sarong Philippine President sa India puon kan nakalihis na Oktubre 2007, kan magbisita si dating Presidente Gloria Macapagal-Arroyo.
Huri man na nagbisita sa Pilipinas an sarong Indian head of state kan nakalihis na Oktubre 2009, sa paagi ni dating Indian President Ram Nath Kovind.
Katakod kan pagbisita, ipinagselebrar ngunyan na taon kan Pilipinas asin India an ika-75 anibersaryo kan saindang diplomatic relations.
