Satisfied si Presidente Ferdinand Marcos Jr. sa nagpapadagos na imbestigasyon na isinasagibo kan Independent Commission for Infrastructure (ICI), alagad nagtitinir na bukas sa suhestiyon kun pano pakukusugon an kapangyarihan asin tungkulin kaini.
Ini an sinaysay ni Presidential Communications Office Undersecretary asin Palace Press Officer Claire Castro kan haputon sa press briefing sa Malakanyang kun ‘satisfied’ si Presidente Marcos sa isinasagibong imbestigasyon kan ICI dapit sa soboot food control anomalies.
Kun igwa nin irarahay pa, dae na man ini sasaraduhan kan Presidente alagad sa ngunyan, sa nahihiling, marahay an pigdadalagan kan pagiimbestigar kan ICI, sigun pa ki Castro.
An paliwanag pa ni Castro, mas makakamaray na mas kadakol “ngipon” an ICI sa nagpapadagos na imbestigasyon. Binanggit pa man ni Castro na an mga opisyal na ipinapaapod kan ICI, ‘cooperative asin responsive’ sa request kan body. Mas marahay talaga na magkaigwa nin pangil an lado kan ICI. Alagad sa ngunyan nahihiling na man na marahay an pigpapadalagan kan ICI.
Pag nagpaapod ini, dawa mga senador, mga miyembro kan Kongreso, sinda man an nagsisimbag asin nagtatao nin pahayag, sinaysay pa ni Castro. Kaya man sa ngunyan, marahay an pigpapadalagan kan ICI asin man ginagalang kan mga witnesses o mga pinapaapod o soboot concerned parties, ginagalang ninda an ICI asin nagsisimbag sinda sa paapod.
Sa report, pigtuyaw ni House Senior Deputy Minority Leader Edgar Erice an Independent Commission on Infrastructure (ICI) kan nakalihis na semana, asin inapod ining “paper tiger” huli sa kawaran kani nin bastante na awtoridad na mag-imbestigar sa mga maanomalyang flood control projects.
Sinaysay ni Erice na an ICI, na pigkriar ni Presidente Ferdinand Marcos Jr., mayong bastante na legal na kapangyarihan tangani mabisang maisagibo an mandato kaini.
Nagpatanid man ini na kun mayong pakarhay na ley, posibleng mabigo an komisyon na pasimbagon an mga opisyal para sa overpriced o maanomalyang mga proyektong pang-imprastraktura.
Bako man talaga independent ang ICI huli ta an nagpapasweldo iyo an Executive branch, an Presidente, kaya anytime, pwede ining i-abolish ini, sigun pa ki Erice. Mayo man nin contempt power. Mayo nin financial asin forensic audit na kapangyarihan para sa ledgers kan contractors.
An access sa infra records sa DPWH, COA pati mga witness protection asin whistleblower mechanism papaano, dugang pa kaini. Kadakol talagang kakulangan kan ICI na ginibo na ini asin baka magluwas na ini ginigibo sana tangani awaton an tawo.
Sa irarom kan Executive Order 94, pigkriar an ICI tangani imbestigaran an mga soboot maanomalyang proyektong pang-imprastraktura asin siertuhon an paninimbagan sa paggamit kan pampublikong pondo.
Naenot nang sinaysay kan lehislador na posibleng magpaapod nin special session an House of Representatives tangani hampangon an propwestong ley na mapakusog sa ICI.
Pigdugang ni Erice na pigbusol kaini an sarong espesyal na sesyon makalihis sabihon kan mga kontratista na sinda Sarah asin Curlee Discaya na dae na sinda makikipagtabangan sa ICI.
