NAGA CITY- Mas pinahigot pa kan Philippine Coast Guard (PCG) sa Camarines Sur an saindang ginigibong monitoring sa mga daungan huli sa nairehistrong mga na-stranded na pasahero digdi huli sa namamatean na maraot na kamugtakan nin panahon.
Sa entrevista kan Bombo Radyo Naga ki Petty Officer First Class Joselito Beñegas, Sub-Station Commander kan PCG-Pasacao, sinaysay kaini na basado sa saindang datos, nag-abot na sa haros 120 an nairehistrong stranded na pasahero sa Pasacao port kabale na digdi an apat na senior citizens asin 14 mga aki.
Pasiring kuta na sa San Pascual Masbate asin sa Burias Island an mga stranded na pasahero sa Pasacao Port.
Sigon ki Beñegas, pigpapangalad pang makapaglawod an mga sararadit na lunadang pandagat huli sa makusog na hukol sa mga kadagatan.
Mahigot man suboot an saindang ginigibong koordinasyon sa mga opisyal sa mga coastal barangays para masierto na mayong mga parasira na mapumirit na maglawod.
Mientrastanto, sigon man ki Ariel Zamudio hale sa PAGASA DOST Legazpi, nakataas pa nanggad ngonyan an gale warning sa mga kadagatang sakop kan Camarines Sur, Camarines Norte, Catanduanes, eastern coast kan Albay asin eastern coast kan Sorsogon.
