Nakamonitor sa ngunyan an Philippine Coast Guard (PCG) matapos an paglilinig sa oil spill sa baybayon kan Mariveles, Bataan.
Segun sa PCG, abot sa 1,660 kilo kan oil-contaminated materials an nakolekta asin ibinugtak sa 83 sako para sa pansamantalang pag-imbak.
An mga nakolektang materyales dadarahon sa sarong accredited waste treatment asin disposal facility tanganing masigurado an ligtas na pagproseso.
Naenot na nadiskubre an oil spill sa Sitio Naswe, Barangay Ipag, na nakaapektar sa haros 500 square meters kan katubigan sa baybayon.
Nakaabot sa kaaraman na tinatantyang 25 litro kan used oil an naglakop sa lugar asin dae pa matukoy kun saen ini nagpuon.
Sa isinagibong joint inspection kan PCG asin Mariveles Municipal Disaster Risk Reduction and Management Office, mayong nang nahiling na oil sheen o bakas nin langis sa ibabaw kan tubig.
Alagad, padagos an pagbantay tanganing masigurado na mayong liwat na paglakop nin langis asin maibitaran an dugang na epekto sa kapalibutan.
