NAGA CITY- Ikinaogma kan manlaen laeng ahensya kan gobyerno sa ciudad nin Naga an nagin matrayumpo asin matoninong na selebrasyon kan kapistahan ni Nuestra Senora de Penafrancia.
Sa paghampang ni Father Carpio kan Archdiocese of Caceres sa mga kagawad kan media, sinaysay kaining naipautob nin marahay an tolong “S” na goal kan ciudad dapit sa nasambitan ng selebrasyon.
Ini an solemnity, safety and security asin success.
Segun pa digdi, dawa nagin problema an sitwasyon kan Naga River kan nagkataong low-tide, dae suboot pinabayaan ni Ina an gabos niyang deboto.
Sa ibong na lado, sa nagin patara- tara man ni Rene Gumba pamayo kan Pubic Safety Office asin Joint Operations Committee (JOC) Manager sinaysay kaining dawa nadipisilan sinda sa pakikipagkomunikar huri sa kawaran nin signal asin mga pasilidad, ikinaogma kaini na naipautob nin marahay an mahigot na seguridad asin mayo nin nairehistrong darakulang aksidente.
Alagad, nagpagirumdom man an opsiyal sa mga deboto na iapon sa tamang basurahan an mga basura ta nanganing mamantinir pa rin an kalinigan kan ciudad.
Tinawang onra kan lokal na gobyerno kan ciudad nin Naga an gabos na nagpartisipar sa Penafrancia Festival 2019.
Sa nagin patara-tara ni Vice Mayor Nene de Asis sinaysay kaining, dae magigin posible an gabos na ini kun mayo an tabang kan manlaen laen na ahensya, mapa- publiko o pribado man.
Ipinaabot man kaini an saiyang pasasalamat sa mga boluntaryong nagtabang sa nasambitan ng aktibidad na imbes nagseselebrar kaibanan an saindang pamilya mas pinili na magserbi sa kapwa asin ki Ina.
