Nagkasundo an Pilipinas asin China na ipagpadagos an pagpapautob nin rotation asin resupply missions sa BRP Sierra Madre sa Ayungin Shoal na makukua sa West Philippine Sea.
An desisyon an ginibo sa ika-10 Bilateral Consultation Mechanism (BCM) meeting kan Pilipinas asin China dapit sa WPS, na pigkundusir sa Xiamen, China.
An pagtitipon an nakapokus sa mga presenteng isyu sa rehiyon, kun saen parehong ipinahayag kan duwang nasyon an saindang komitment sa diyalogo asin kooperasyon sa ibong kan mga dae pa nasisimbagan na isyu.
Nagkasundo an duwang nasyon na ipagpadagos an mga rotation asin resupply operations (RORE) sa Ayungin Shoal tanganing mahali an tensyon, asin pigbibisto an mga positibong resulta kan mga misyon na ini.
Pigpahayag man kan Pilipinas an mga alalahanon dapit sa presensya kan mga barko kan Chinese Coast Guard (CCG) harani sa Zambales asin an saindang mga aktibidad sa mga maritime zones kan Pilipinas, na sigun sa Department of Foreign Affairs (DFA) an bakong tugma sa 1982 United Nations Convention on the Law of the Sea (UNCLOS) asin sa mga ley pang-maritime kan Pilipinas.
Huli digdi, nagkasundo an duwang nasyon na pakusugon an kooperasyon kan saindang mga coast guard asin pigtawan duon an importansya kan pagtatarabangan sa ocean meteorology asin marine scientific cooperation. Liwat pigsierto kan Pilipinas an dedikasyon kaini sa matuninong na pagresolbar kan mga hidwaan sa paagi kan diyalogo asin diplomasya, siring kan tinawan-duon ni Presidente Ferdinand Marcos Jr.
Mientrastanto, nakatalaan man na isagibo sa Pilipinas an masunod na Bilateral Consultation Mechanism meeting na ‘mayo pang opisyal na petsa.
