Nagtao an Pilipinas nin mga supplies para sa mga naapektaran kan gyera sa Gaza sa paagi kan Humanitarian Air Bridge Campaign.
Obheto kan inisyatibong ini na magtao nin tabang sa mga apektadong mga Palestino na labi na naapektaran kan sigalot kan Israel asin Hamas.
Sigun sa Office of Civil Defense (OCD), kaibahan sa donasyon an 8, 323 bonnet, 3, 187 pares kan gloves, asin 20 tamong.
Nangyari an turnover sa NDRRMC Operations Center sa Camp General Emilio Aguinaldo, na pinangenotan ni OCD Administrator asin National Disaster Risk Reduction and Management Council Executive Director, Undersecretary Ariel Nepomuceno.
Nagpartisipar man sa nasambitan ng seremonya an mga opisyal gikan sa danian Honorary Consulate asin Department of Foreign Affairs (DFA).
Sa saiyang patara-tara, pigtawan-duon ni Nepomuceno an importansiya kan kontribusyon kan Pilipinas sa Humanitarian Air Bridge Campaign na pinangenotan kan Hashemite Kingdom of Jordan.
Kun saen pigtampok kaini an pagkasararo kan nasyon sa mga Palestinian sa Gaza asin an importansiya kan tulos na tabang sa tahaw kan padagos na naglalalang krisis sa lugar.
Sigun sa mga report, nagpuon nang magbweltada an ribu-ribong mga Palestino sa Gaza.
Siring man, kadaklan sa mga istruktura an labing nadanyaran siring an kawaran kan supply kan kuryente sa lugar asin mga pangenot na supplies.
Sigun sa Ministry of Health kan Gaza, haros 47,000 Palestino an binawian nin buhay gikan kan magpuon an gyera kan nakalihis na Oktubre 2023.
