(UPDATE) NAGA CITY- Mas pinahigot pa kan manhamiento kan 9th Infantry Division, Philippine Army an saindang ginigibong pagbabantay asin operasyon sa probinsya nin Camarines Norte makalihis an nairehistrong bakbakan suodmang aga, Marso 29, sa pag-ultanan kan rebeldeng grupong New People’s Army (NPA) asin tropa kan gobyerno kasabay kan Huwebes Santo asin anibersaryo kan makawalang grupo suodma.
Sa entrevista kan Bombo Radyo Naga ki Capt. Joash Pramis, chief kan Division of Public Affairs Office (DPAO) kan 9ID, sinaysay kaini na igwa nin nagpaabot suboot nin impormasyon sa mga militar na nagkokondusir nin checkpoint asin nagbubugtak nin mga banner an pigtutubudang mga rebelde sa nasambitang lugar katakod kan saindang ika-49 anibersaryo suodma, Marso 29.
Tulos suboot na nagpasiring an mga kabuhan kan 9th Infantry Battalion, Philippine Army sa barangay Itok asin digdi na nakabakbakan kan mga ini an pigkakarkulong 15 mga NPA suodma alas-11:55 nin aga.
Naghaloy man suboot nin haros 20 minuto an riribayan nin putok sa pag-ultanan kan duwang lado na nagresulta sa pagkagadan kan sarong pigtutubudang rebelde asin narekober man sa pinangyarihan kan bakbakan an sarong m16 rifle.
Sigon ki Pramis, padagos an saindang ginigibong koordinasyon sa mga namamanwaan sa lugar para mabistado an nagadan na miyembro suboot kan rebelde mantang inaaram pa kun igwa pang ibang nairido sa lado kan mga NPA.
Mientrastanto, pigsierto man kan opisyal na mas pinahigot pa an ginigibong monitoring kan Philippine Army asin pagbabantay sa manlaen laeng lugar sa rehiyong Bicol para mapugulan an anuman na planong pag-atake kan mga rebeldeng grupo urog pa ngonyan na semana santa.
