Preparado an PhilHealth sa posibleng paglangkaw kan kaso nin dengue asin mga helang na dara kan init arog kan heat exhaustion, heat stroke, heat cramps, asin dehydration.
Sa intrevista kan Bombo Radyo Naga kay Leri L. Ilagan – Head, Public Affairs Unit, Philhealth Regional Office V, sinabi kaini na an mga kwalipikadong miyembro pwedeng makakua nin mga benepisyo para sa siring na mga kondisyon.
Dugang pa ni Ilagan na an Outpatient Emergency Care Benefit pwede man gamiton para sa mga pasyente na pigbubulong sa emergency room kan sarong accredited na Level 1 hasta Level 3 na ospital dawa dae malampas sa 24 oras an confinement. Para sa mga kondisyon na bakong emerhensya, an paggamit kan YAKAP ineenkaminar para sa mga konsultasyon asin mga pag-eksamin sa laboratoryo.
Naglangkaw man an PhilHealth package para sa dengue. An case rate sa mild dengue nag-aabot sa P19,500 asin maabot sa P47,000 sa severe dengue. Sa paagi kan YAKAP, an CBC pwede man gibohon tanganing ma-assess an platelet count asin kondisyon kan pasyente.
Nangapudan an PhilHealth sa publiko na tulos na magpakonsulta kun nakakaeksperyensya nin kalintura, kaluyahan, kulog nin payo, rashes, kawaran nin gana sa pagkakan, asin iba pang sintomas na posibleng may relasyon sa dengue. Ini man nagpapagirumdom saimo na papagdanayon na updated an saimong mga rekord nin pagiging miyembro asin mga dependents.
paliwanang pa ni ilagan na pwede man gamiton an eGovPH Super App para mahiling an saindong PhilHealth records asin benepisyo.
Mientrastanto, igwa nin programa kan GAMOT para sa libreng mga piling bulong para sa mga kwalipikadong miyembro. Pig-eenkaminar an publiko na dae na halaton na maggrabe pa an helang bago maghagad nin konsultasyon.
