NAGA CITY – Pigkukundusir sa manlaen-laen na mga barangay sa syudad nin Naga an Philhealth Yakap Caravan.
Sa entrevista kan Bombo Radyo Naga ki Al Delos Santos – Team Leader, Philhealth Yakap, Camarines Sur Chapter, sinaysay kaini na sakop kan saindang programa an bilog na Camarines Sur.
Sigun ki Delos Santos, an project YAKAP an program kan PhilHealth na kun saen igwa nin pakikipagtabangan sa mga lokal na gobyerno asin mga accredited na YAKAP Clinics na obhetong mairani an primary care services sa mga PhilHealth members.
Sa nagin caravan, target ninda na makumpletong maiparehistro an primerong anom na mga barangay sa syudad nin Naga.
Piglinaw pa kan opisyal na sa presente igwa na nin pig oopesir na cosultation services, laboratory services asin an mga libreng bulong.
Tangani makapag avail, kaipuhan sana na igwa nin mga PhilHealth number, saka ini ilalaag sa mga YAKAP Clinics tangani opisyal na makagamit kan nasambitan ng mga services.
Dati nang kahagadan ni Naga City Mayor Leni Robredo na gabos na Nagueños an mailaog sa programa sa taong 2028, algad sa presente pwede nang maabot an haros kabanga kan populasyon kan syudad.
Sa ibong na lado, piglinaw ni Delos Santos na nagin katabang ninda sa prpgrama iyo an Lokal na Gobyerno kan Naga, City Health Office 2, CSWDO, Local Civil Registry Office.
Sa ngunyan, pigtawan duon pa kan opisyal na an Philhealth Yakap services an mayo nin dugang na bayad, kun ano an pighuhulog sa PhilHealth, iyo na mismo an nagigin kontribusyon na piggagamit tangani ma-avail an mga services na ini.
