Pigsagibo na kan Philippine Air Force (PAF) an training kaiba an Philippine Navy (PN) tangani mapamarhay an kapasidad kan saindang mga helicopter sa paglapag sa mga barko.
Sigun ki PAF spokesperson Col. Ma. Consuelo Castillo, obheto kan ship deck operations training na siertuhon an kakayahan kan PAF helicopters sa maritime operations.
An pahayag an kasunod kan insidente kan nakalihis na Pebrero 18 kun saen sarong Chinese Navy helicopter an nagsagibo nin mapanganib na flight maneuvers kontra man sa sarong Bureau of Fisheries and Aquatic Resources (BFAR) aircraft na nagsasagibo nin maritime patrol sa Bajo de Masinloc.
Pigsaysay man ni Castillo na bagaman igwa nin partikular na operational requirements sa manlaen-laen na lugar, may kakayahan an saindang helicopters para sa ship deck operations.
An mga barkong ginamit sa pagsasanay iyo man an landing dock vessels na BRP Tarlac (LD-601) asin BRP Davao Del Sur (LD-602), pati na man an darakulang transport ships kan PH Navy.
