Lubos na preparado an Philippine Coconut Authority (PCA)-Camarines Sur 1 sa posibleng epekto kan Super El Niño sa mga paratanom nin niyog asin plantasyon nin niyog sa probinsya. Kaiba sa tulos na lakdang an pagdistribwer nin abono sa mga kwalipikadong benepisyaryo na rehistrado sa National Coconut Farmers Registry System o NCFRS.
Sa intrevista kan Bombo Radyo Naga ki Randy Padre- Senior Agriculturist- Philippine Coconut Authority- CAMSUR 1, sinabi kaini na an pag-abono makakatabang na magin mas matibay an mga poon nin niyog sa sobrang init. Ipapadagos man an paghatod nin abono sa mga lugar na sakop kan ahensya, mantang ineenkaminar an mga paraoma na maggamit nin kompost asin iba pang organikong materyales ngani na mamantenir an kahamigan kan daga.
Irinirekomendar man an pagtanom nin mga pananom na pantahob asin iba pang mga intercrops, kaiba an mga gulay, tanganing mabawasan an marikas na pagmara kan daga. An ubak kan niyog asin iba pang basura sa oma pwede man gamiton bilang mulch sa palibot kan mga poon nin niyog tanganing makatabang sa pag-iingat kan tubig.
Kasabay kaini, nagpagirumdom man an PCA sa mga paraoma na mag-ingat sa mga peste na pwedeng magdakol sa panahon nin labi-labing init, arog kan scale insects asin coconut mites. An mga paraoma pig-eenkaminar na tulos na ireport an anuman na infestation sa PCA para sa biological asin mekanikal na kontrol, kabali an paghale kan mga apektadong dahon o mga dahon.
Pigduon ni Padre an kahalagahan kan amay na preparasyon nin huli ta an epekto kan grabeng tigmara sa produksyon kan niyog posibleng maghahaloy bago magmanifestar. Inagyat kaini an gabos na paratanom nin niyog na magdanay na alerto asin aprobetsaran an mga programa asin interbensyon kan ahensya ngani na maiwasan an posibleng epekto kan Super El Niño sa saindang mga plantasyon.
