Opisyal nang binago kan Philippine Navy an Naval Forces West asin nire-organisar komo Western Naval Command tanganing magpokus sa mga security concern sa West Philippine Sea (WPS).
Sa irarom kan bago kaining istruktura, nasugo an Western Naval Command na pakusugon an mga maritime security operations kaini sa western seaboard kan Pilipinas sa tabang kan mga dugang na personnel.
Apwera sa dakulang parte kan WPS asin territorial sea kan Pilipinas sa western seaboard, sakop man kan hurisdiksiyon kan nasambitan ng command iyo an mga maritime area na nakapalibot sa Pag-sa Islands asin Ayungin Shoal.
Kaibahan digde an BRP Sierra Madre, an barkong pandigma na isinadsad sa Ayungin tanganing magsirbi komo military post.
Komo primerong naval command na igwang hurisdiksiyon sa WPS, pangengenotan kaini an mga serye kan maritime patrol operations asin siertuhong mabantayan an kadagatan, bahura asin iba pang maritime feature na nasa irarom kan teritoryo kan nasyon.
Sa nagin mensahe ni Navy Flag Officer-in-Command Vice Admiral Jose Ma. Ambrosio Ezpeleta kasabay kan opisyal na seremonya, pigtawan-duon kaini an pangangaipuhang mapahewas pa an sakop asin mandato kan navy, salig na pigtalaan kan Comprehensive Archipelagic Defense Concept.
Pig-enkaminar man ni Western Naval Command Commander Commodore Vincent Sibala an mga personnel kaini na magin matatag sa paggampan ninda sa saindang mga tungkulin.
