NAGA CITY- NAKATALAAN na mag-deploy nin kadakol na volunteers an Philippine Red Cross Camarines Sur Chapter para sa Peñafrancia Festival.
Sa entrevista kan Bombo Radyo Naga ki Maria Felisa Badiola, Chapter Administrator kan Philippine Red Cross Camarines Sur Chapter, sinaysay kaini na huli sa piglalaoman na pagdagsa kan mga deboto ni Ina Peñafrancia, maabot sa duwang ribo hasta tolong ribo an idedeploy na volunteers sa gabos na event na ikukundusir.
Sigun ki Badiola, igwa sindang idedeploy sa Traslacion, scout parade, civic and military parade asin fluvial procession.
Dugang pa kan opisyal, igwang 26 na stations an ipo-posisyon kun saen igwa man nin foot patrol asin mother station.
An mga ini an makukua sa aagihan kan aktibidad o prusisyon tanganing magtao nin asistensiya sa mga mangangaipuhan.
Mientrastanto, huli sa pagkakaigwa nin pagbabago sa ruta ngunyan na taon, nagkaigwa naman nin adjustment an Philippine Red Cross Camarines Sur tanganing kadakol an maakomodar na indibidwal na mangangaipuhan kan saindang serbisyo.
Sa ngunyan, hagad na sana kaini an kooperasyon kan publiko para sa mas salbadong pagselebrar kan Peñafrancia Fiesta ngunyan na taon.
