Nilagdaan ng Pilipinas at France nitong Huwebes ang Status of Visiting Forces Agreement (SOVFA) upang palakasin ang kooperasyon sa depensa at magkasanib na aktibidad militar ng dalawang bansa.
Ayon sa joint press release, nagkita si Philippine Defense Secretary Gilberto Teodoro Jr. at French Minister for the Armed Forces and Veterans Catherine Vautrin sa Paris para sa bilateral meeting. Binanggit nila ang matagumpay na negosasyon na nauwi sa pirma ng SOVFA, na magbibigay ng legal na proteksyon sa magkasanib na aktibidad ng Armed Forces of the Philippines at French Armed Forces.
Tinalakay din sa pulong ang mga isyu sa rehiyonal na seguridad sa Indo-Pacific, Middle East, at Europe, kabilang ang kahalagahan ng multilateralism, rules-based international order, at mapayapang resolusyon ng mga alitan. Kumpirmado rin ang kanilang suporta sa United Nations Convention on the Law of the Sea at ang kahalagahan ng South China Sea Arbitral Award.
Tinanggap ng Pilipinas ang pakikilahok ng France sa mga mekanismo ng Southeast Asia, kabilang ang ASEAN at ASEAN Defence Ministers’ Meeting-Plus, lalo na sa humanitarian assistance, disaster response, at maritime security initiatives.
Ipinagdiinan nina Teodoro at Vautrin ang kanilang pangako sa pagpapalalim ng pangmatagalang ugnayan sa depensa at sa pagpapatupad ng layunin ng kanilang December 2023 letter of intent sa bilateral defense cooperation.
Ayon sa 1987 Philippine Constitution, ipinagbabawal ang permanenteng military bases ng ibang bansa sa Pilipinas. Ngunit sa ilalim ng mga kasunduan tulad ng VFA, maaaring pansamantalang makapasok ang mga dayuhang hukbo para sa joint exercises at humanitarian missions. May SOVFA na rin ang Pilipinas sa United States (1999), Australia (2007), at New Zealand (2025).
Sa mga nakaraang taon, pinalawak ng Pilipinas ang maritime at defense security cooperation sa iba’t ibang bansa bilang tugon sa tensyon sa West Philippine Sea.
