Padagos pa man giraray an pag-aalburuto kan Bulkang Kanlaon sa Negros Island sa nakalihis na magdamlag.
Basado sa pinakahuring monitoring kan Philippine Institute of Volcanology and Seismology, maabot sa 22 volcanic earthquakes an nairehistro kan saindang monitoring stations sa laog nin 24 oras.
Kabali na digde an tulong volcanic tremors na madurar sa pag-ultanan nin walo hasta sa 31 minuto.
Nairehistro man kan ahensya an tulong ash emissions na naghaloy man nin lima hasta 44 na minuto. Maabot na man sa 4,222 tons kan Sulfur dioxide flux an ibinuga kan bulkan na igwang langkaw na 900 meters mantang padagos pa man an pamamaga kan bunganga kaini.
Ipinagbabawal pa man an paglaog sa 6-kilometer danger zone asin man pagpapalupad nin anumang klase nin lunadang panghimpapawid sa bungangakan nasambitan ng bulkan.
