NAGA CITY- Pinara ngonyan kan Philippine Institute of Volcanology and Seismology (PHIVOLCS) an paghandal kan publiko sa posibilidad nin pagkakaigwa nin tsunami katakod kan nagtamang magnitude 6.0 na linog sa Pandan, Catanduanes pasado alas-2:19 nin hapon subago.
Sa ekslusibong entrevista kan Bombo Radyo Naga ki Phivolcs Dir. Renato Solidum, sinaysay kaini na maluya sana an magnitude kan linog na nagtama sa kadagatang sakop kan nasambitang banwaan kun kaya dae ini makaka-trigger nin tsunami.
Pigklaro man ni Solidum na nasa 46 km norte norteng sulnupan kan Philippine Sea an epicenter kan nasambitang linog na igwang rarom na 21 km asin tectonic an pinaghalean.
Mayo man suboot nairehistrong nadanyaran sa nangyaring pagyugo yugo urog pa ta yaon sa kadagatan an epicenter kaini.
Mientrastanto, namatean man an Intensity IV sa Irosin, Sorsogon; Legazpi City, Ligao asin Sto Domingo sa Albay; Iriga City sa Camarines Sur; Jose Panganiban, Camarines Norte asin Alabat, Quezon
Intensity III man an namatean sa Obando, Bulacan; Guinayangan, Lopez asin Infanta, Quezon; Sorsogon City asin Marikina City.
Nairehistro man an Intensity II sa Quezon City; Masbate City sa Masbate; Lucban asin Mauban, Quezon; Quezon City; Catbalogan, Samar; Cabanatuan City asin Palo, Leyte.
Mantang namatean man an Intensity I sa Tagaytay City, Lucena asin Dolores, Quezon; Malabon City; San Ildefonso, Bulacan; Guagua, Pampanga asin magin sa Pasig asin Marikina City.
Mientrastanto, tinawan doon man ni Solidum, na mayong kinaaraman an nagtamang magnitude 6.9 na linog sa Hawaii sa namatean na pagyugo yugo urog pa ta harayo an pag-ultanan kan duwang lugar.
Inaaram pa ngonyan kan Phivolcs kun posibleng igwang koneksyon sa Philippine trench an nangyaring linog.
