Pigkahadit ni House Deputy Minority Leader asin ACT Teachers Party-list Rep. France Castro an peligro na pwedeng ihatod kan pigbubusol na paramientras na paglaya ni dating Presidente Rodrigo Duterte gikan sa detention facility kan International Criminal Court o ICC.
Paliwanag ni Castro, dawa sain man na parte kan kinaban ibugtak si former President Duterte, padagos kaining mapagbabantaan an mga biktima asin testigo sa saiyang mga krimen kontra sa sangkatauhan.
Duon pa ni Castro, enkaso nakaluwas sa kulungan an magkakaigwa man nin tyansa si dating Presidente Duterte na maghasik nin mga salang impormasyon na makakaapektar sa proceedings kan ICC.
Katakod kaini, nangapudan man si ACT Teachers Party-list Representative-elect Antonio Tinio sa mga bikitma, human rights organizations, asin sa mga nagbubusol kan hustisya na aktibong tutulan an petisyon tangani paramientras makalaya si dating Presidente Duterte.
