NAGA CITY- Nagin matrayumpo an pigkundusir na Launching and Ceremonial Kick off kan Kaogma Motorcycle Cops kasuudma, Enero 12, 2025 sa Camarines Sur Police Provincial Office, Camp Colonel Juan Querubin Miranda, Concepcion Grande, Naga City.
Sa entrevista kan Bombo Radyo Naga ki PCPT. Liza Jane Alteza, PIO kan CSPPO, sinaysay kaini na obheto soboot kan nasambitan ng aktibidad an magkaigwa nin dugang na pwersang mabantay sa mga highways asin sa pig-aapod na public convergence.
Apwera digde an Kaogma Motorcycle Cops an piglalaoman sa pagpapahigot kan police presence, traffic management siringman makatabang sa paglaban kontra sa anuman na krimen sa probinsiya kan Camarines Sur siring kan theft asin robbery.
Sigun pa sa opisyal, sa paagi kan Kaogma Motorcycle Cops mas mapaparekas an pagresponde sa emerhensiya nin huli ta nagbabantay an mga ini sa tinampo puon alas 6:30 nin aga hasta alas 7 nin aga siringman puon alas 3 nin hapon hasta alas 6 nin bangi.
Mientrastanto, padagos man an mahigot na pagbabantay kan mga personahe kan CSPPO sa mga strategic na lugar katakod kan pigpapautob na Comelec Checkpoints para sa gun ban.
Sa ngunyan, hagad na sana liwat kan opisyal an kooperasyon kan gabos tanganing malikayan an anuman na untoward incidents orog na ngunyan na paparani na an 2025 National and Local Elections.
