NAGA CITY- Kamawotan soboot kan piglunsar na bicycle response unit sa siyudad nin Naga na maenkaminar an publiko na pilion an anuman na klase kan active transport.
Sa nagin paghampang sa mga kagawad kan media ni Renne Gumba Director kan Public Safety Office Naga,sinaysay kaini na an bicyle response unit naka-angkla sa adbokasiya kan siyudad nin Naga katabang an Naga City Bike Board asin City Health Office na nagbubusol kan paggamit nin bisikleta asin iba pang makalumang paagi kan transportasyon siring kan paglakaw o iba pang non-motorised vehicles .
Sigun ki Gumba, makakatabang ini tanganing mabawasan an paggabat nin trapiko orog na ta igwang mga area sa Naga City na sadit sana an mga tinampo.
Apwera digde, makakatabang man an pagbusol sa paggamit nin bisikleta asin iba pang klase kan active transport sa pagkakaigwa nin marhay na salud asin makakatabang sa pagproteher sa kapalibutan.
Sa ngunyan, padagos an pagirumdom kan opisyal sa publiko na sumunod sa pigpapautob na mga ordinansa orog na an pagsunod sa batas trapiko tanganing dae mabugtak sa alanganin na sitwasyon.
