NAGA CITY- Arestado an pigtutubudang miyembro kan African Drug Syndicate (ADS) makaliihis an pigkondusir na anti-illegal drug operation kan Philippine Drug Enforcement Agency (PDEA) sa Bacoor City, Cavite subagong aga.
Binisto an mga suspek na sinda Stanley Chukwuemeka alyas Mark, sarong Nigerian National asin sinasabing miyembro kan nasambitang drug syndicate asin sarong Jayron Maligaya.
Sa nagunong impormasyon kan Bombo Radyo Naga, napag-araman na alas-8:45 nin aga kan ikondusir an buybust operation kan pinagsarong pwersa kan PDEA Camarines Sur, PDEA Bicol asin PDEA Region 4A na nangyari sa kalabaan kan Marcos Alvarez Highway, Bacoor City, Cavite na nagresulta sa pagkakadakop kan nasambitang mga suspek.
Nakumpiskar sa mga ini an sarong plastic bag na naglalaog nin pigtutubudang shabu na maabot suboot an gabat sa poko mas umenos 500 grams na igwa nin street value na pigkakarkulong P2.5 milyon na nakabugtak sa side mirror kan kotse na ginamit kan mga suspek.
Sa ngonyan nagtitinir na sa kostudiya kan PDEA Region 4A an nasambitang mga suspek para sa maninigong disposisyon.
