Mahigot na pig-momonitor kan Pilipinas an sitwasyon sa Venezuela kasunod kan mga report dapit sa mahewasang operasyong militar kan US forces. Ini an pighayag kan Department of Foreign Affairs (DFA).
Sigun ki Foreign Affairs Spokesperson Angelica Escalona, nangapudan an Pilipinas sa gabos kan panig na resolbaran an saindang mga dae pagkakaintindihan sa mapayapang paagi asin maglikay sa mga lakdang na pupwedeng magpalala pa kan tensiyon sa rehiyon.
An pahayag kan DFA kasunod kan anunsyo ni U.S. President Donald Trump na nagsagibo soboot an Estados Unidos nin sarong “large-scale strike” laban sa Venezuela na nagresulta sa pagkaka-arestar ni Venezuelan President Nicolas Maduro asin kan agom kaini.
Mientrastanto, pigpagirumdom kan Philippine Embassy sa Colombia, na may hurisdiksiyon sa Venezuela, an mga pilipino duman dapat magtinir na alerto asin aramon an mga salbado na lugar na pupwedeng pagtaguan enkaso maglala pa an sitwasyon.
Basado sa tala kan DFA, may kabilogang 74 na Pilipino na presenteng nakaistar asin nagtatrabaho sa Venezuela.
