Nagrehistro an Pilipinas nin pinakahalangkaw na singil sa kuryente sa mga nasyon na kabali sa Association of Southeast Asian Nation (ASEAN) kan Hunyo, segun iyan sa Department of Enery (DOE), huli sa limitadong suplay asin halangkaw na demand kan kuryete.
Segun sa DOE Undersecretary Rowena Cristina Guevara, uminabot sa P12.43 an kada kilowatt-hour (kWh) an average sa presyo kan kuryente sa nasyon kan Hunyo, na mas halangkaw na nin P0.093 sa kada kWh kumpara sa singil sa Singapore.
Ipig-esplikar man ni Guevara na pinakahalangkaw an singil sa Visayas huli sa kakulangan kan suplay sa rehiyon. Segun pa saiya, may 21 power plant units na naka eksperyensa nin forced outage kaya nag aasa an Visayas sa suplay hale sa Luzon asin Mindanao.
Pirang aldaw na naka eksperyensa nin yellow alert an Visayas grid kan Hunyo, na nangangahulogan na dae sapat an operating margin kan sistema tanganing matugonan an kinakaipohan na reserba para sa seguridad kan transmission grid.
Kabali sa mga pangenot na rason kaini iyo an pagkaantala kan operasyon kan nagkapirang darakula na coal-fired powerplant sa rehiyon.
Kaiba sa mga naapektarang pasilidad an Therma Visayas Inc. Unit 1 saka 2 asin Panay Energy Development Corp.
Mienstranto, segun sa DOE na nagdugang man an singil sa kuryente huli sa halangkaw na demand sa kada summer months. Huli digdi, kinakaipohan na paandaron an mas halangkaw na kalidad kan power plants tanganing maibitaran an kakulangan sa suplay asin posibleng pag brownout.
Segun pa ki Guevara, imbes na mag-blackout, pinapaadar na lang an mga mas makalidad na planta.
