Aram baya nindo mga ka-Bombo, pinag-aadalan na kan grupo kan mga archeologist asin paleontologist an mga nakuang fossilized bones asin mga ngipon kan hayop sa Tabuk City, Kalinga na pinagtutubodan gikan sa sarong elepante.
Nadiskubre kan mga residente an presensiya kan mga ini sa sarong lugar, kaibahan an mga petrified wood.
Tulos man na nagpasiring sa lugar an mga eksperto gikan sa Ateneo de Manila University, National Museum of the Philippines, asin iba pang Internation Institutions tanganing aramon an mga ini.
Pinagtutubodan na pira sa mga butong nahiling sa lugar an parte kan panga kan sarong elepante, kaibahan an saiyang mga ngipon.
Enot nang narekober kan mga eksperto an mga buto kan rhinoceros harani sa lugar, kaibahan an mga buto kan stegodon, asin iba pang mga hayop.
Basado sa naenot na resulta kan pag-aadal sa mga ini, an buto kan rhino an pigkakarkulong igwang edad na 709, 000 na taon.
Sa presente, pigpoprotehiran kan gobyerno an mga lugar kun saen nakalot an mga ini mantang padagos na pinag-aadalan an mga na-rekober na bagay.
