Pinahiwas kan Philippine Health Insurance Corporation (PhilHealth), sa pakikipagtabangan sa Bureau of Jail Management and Penology (BJMP) an Access sa mga serbisyo sa salud para sa mga Persons Deprived of Liberty (PDLs) sa paagi kan Yaman ng Kalusugan Program (YAKAP).
Sa intrevista kan Bombo Radyo Naga Ki Annielyn Z. San Pablo – Chief Social Insurance Officer, sinabi kaini na katakod kan prinsipyo kan Universal Health Care, mayo dapat mabayaan pag-abot sa serbisyo sa salud, kabale digdi an mga PDL, na dapat maka resibe nin magkakanigong pag-ataman medikal mantang yaon sa mga pasilidad kan BJMP.
Segun ki Pablo, an PhilHealth asin an BJMP igwa nang nagmukna nin Memorandum of Agreement (MOA) kan 2025 bago pa an national-level agreement kan duwang ahensya. Katuyuhan kan inisyatiba na maparehistro an mga PDLs asin mga empleyado kan BJMP sa irarom kan YAKAP para maseguro an saindang access sa health benefits.
Sa irarom kan programa, an mga kwalipikadong miyembro puedeng mag-avail nin mga serbisyong medikal kaiba an mga konsultasyon sa doktor asin manlaen-laen na mga pag-eksamin sa laboratoryo asin diagnostic, arog kan mga pag-eksamin sa kolesterol, mga electrocardiogram (ECG), asin mga X-ray
Nakikipagkoordinar an PhilHealth sa BJMP tanganing makua an master list kan Persons Deprived of Liberty (PDL) asin masiguro an saindang rehistrasyon sa programa.
Padagos man koordinasyon kan PhilHealth sa mga pasilidad kan BJMP tanganing ma-update an mga rekord kan PDL kaiba an mga nakaluwas na sa kustodiya tanganing maseguro na an saindang mga rekord nin pagiging miyembro nagdadanay na eksakto asin napapanahon.
Mientrastanto, an BJMP Tabaco jail clinic iyo an nagin pinakaenot sa nasyon na naakreditar sa irarom kan YAKAP, na minamarka nin sarong mahalagang lakdang pasiring sa pagpahiwas kan serbisyong medikal sa laog kan mga correctional facilities.
Sa paagi kan inisyatiba kan YAKAP, obheto kan PhilHealth asin kan BJMP na mapakarhay an estado kan salud kan mga PDL asin maseguro na an saindang pagkakulong dai magseserbing ulang sa pag-access kan kinakaipuhan na serbisyong medikal.
