Sarong Pinay sa Kuwait na duwang bulan nang nawawara, an nadukayang gadan asin naaagnas na an lawsa sa harong kan sarong Kuwaiti national.
Sigun ki Department of Migrant Workers (DMW) Secretary Hans Leo Cacdac, an OFW na binistong si Dafnie Nacalaban, an limang taon nang nagtatrabaho sa Kuwait. Sinaysay ni Cacdac na sigun sa employer kan biktima, Oktubre pa kan maghali ini sa sainda, asin ini man soboot an huring pagkakataon na nakaulay ini kan saiyang pamilya.
Kan Disyembre 31, 2024 nadiskubre an bangkay kan Pinay sa laog kan harong kan sarong Kuwaiti citizen, makalihis na mismong an tugang kan suspek an magreport kaini asin isuko an saiyang tugang sa mga awtoridad.
Sinaysay man ni Cacdac na bako pang malinaw ngunyan an mga detalye kan mga pangyayari asin dae pa man ninda aram an relasyon kan suspek sa biktima. An aram pa sana soboot ninda an naarestrar na an pangenot na suspek sa pagkagadan alagad dae pa aram kun ini an mismong employer kan biktima.
Pigsierto man ni Cacdac na masusi na sindang nakikipag-koordinar sa mga kinauukulan asin igwa na man sindang abogado nakatutok sa kaso.
Nakikipag-coordinate na man sinda sa Kuwaiti prosecution tanganing malitis, mausig, asin magkaigwa nin hustisya an pagkagadan kan Pinay.
Plano na kutang magpuli kan nasambitan ng Pinay sa nasyon kan Disyembre alagad dae na ini nadagos. Bako man ini an enot na pagkakataon na may Pinay na ginadan sa Kuwait.
Enot na man na ginadan si Jullebee Ranara, na an bangkay an nadukayan nasulo sa disyerto asin si Joanna Demafelis, na an bangkay an nadukayan na nakatago sa laog kan sarong freezer.
Kasuarin sana, sarong OFW an inarestrar kan mga otoridad sa Kuwait makalihis aminon an na ginadan an aki kan saiyang Kuwaiti employers, sa paagi kan paglalaog kaini sa washing machine.
