Padagos an pag-arangkada kan Detroit Pistons makalihis kaining tambakan nin 20 points an No.2 team sa Eastern Conference na Boston Celtics.
Ini an ika-walong magkakasunod na pagkagana kan Pistons, sarong panibagong achievement na dae pa nagigibo kan koponan puon kan taong-2008.
Nagibo kan Pistons na tapuson an 6-game winning streak kan defending champion gamit an haros 53% na overall shooting percentage.
Sinamantala kan Pistons an daepagkawat ni 2024 NBA Finals MVP Jalen Brown tanganing maglaog nin kabilogang 47 shots mantang pigbabantayan man an rebounding asin magkamada nin kabilogang 51 rebounds.
Sulamente 33 shots sana an naisimbag kan Boston asin dae kaini nagibong makipagsabayan sa depensa kan Detroit.
Sa kabilogang laban, nagkamada man an Pistons nin 13 steals asin pinirit an defending champion na maggibo nin 17 turnover.
Sulamente sa 3-point area sana naglamang an Boston kun saen nailaog kaini an 21-3 pointers kontra sa 13 na kasimbagan kan Pistons.
Siring man, dae nagin bastante an 3-point line tanganing maisalbar an 2024 champion.
Liwat pinangenotan kan bagitong guard na si Cade Cunningham an saiyang koponan asin nagbulsa nin 21 points asin 11 assists mantang 26 points man an nai-ambag kan bench na si Malik Beasley.
Sa Boston, sulamenteng si Jayson Tatum an naggibo nin 20-point performace (27pts, 6 rebs).
