Nakakurit an pamayuhan kan Paranaque Integrated Terminal Exchange (PITX) nin haros kabangang milyong pasahero sa laog sanan nin duwang aldaw na pagluwas kan mga pasahero sa saindang mga probinsiya.
Kan nakalihis na aldaw nin Biyernes, nagpakol na sa 203,511 na mga pasahero an mga nag abot asin nagpuli sa saindang mga probinsya para sa papaabuton na kapaskuhan.
Kan aldaw man nin Sabado, nagpakol sa dae mababa sa 218,172 an nagpagserbihan na mga pasahero kan PITX dara pa man kan mga nag uuli para sa holiday season.
Apwera pa digde, magpuon kan Disyembre 16 hasta sa petsa 20 nakakurit man nin kabilogang numero na 166 an mga nakumpiskar na gamit gikan sa mga pasahero sa nagin inspeksyon kan mga otoridad sa mga bagahe kaini.
Nakumpiskar an pirang matarom na bagay kun saen 15 digde an gunting, 35 cutter blade, walong tabak asin 14 na kutsilyo.
Dae man pigtugutan n mga flammable items kun saen 26 sa mga ini an butane gas, tulo an gasolito asin 65 man an lighter.
Marurumduman na nakapirang utro na nagpagirumdom an pamayuhan kan PITX na likayan na an pagdadara nin mga siring na klase nin kagamitan tangani na dae na makadagdag pa sa hassle kan mga nagbabyahe ngunyan na holidays.
Piglalaoman man kan PITX na bahagyang nagbaba an numero kan mga pasahero pag abot nin Lunes.
Mantang nagtitinir man na fully booked hasta sa Disyembre 24 an mga trips pauli nin Bicol Region.
