NAGA CITY- Nakatalaan na tawan nin Plaque of Recognition kan Sangguniang Panlalawigan kan probinsya nin Camarines Sur si Bb. Pilipinas Universe Rachel Peters sa oras na mag-uli na ini sa rehiyong Bicol.
Kasabay kan pigkondusir na session regular, sinaysay ni Board Member Gilmar Pacamara na maninigo sana na tawan nin pagbisto an nasambitang bicolana beauty queen huli sa trayumpo asin onra na pigdara kaini sa bilog na rehiyong Bicol.
An nasambitang recognition nakatalaan na itao sa bicolana beauty queen kasabay kan pagbubukas kan Kaogma Festival kun saen nilalaoman na maatendir ini.
Enot pa kaini, sinaysay man ni Camarines Sur Vice Governor Fortunato ‘Ato’ Peña na magkakaigwa nin hero’s welcome para sa pag-puli sa probinsya ni Peters.
Si Peters na hale sa Canaman, Camarines Sur an girlfriend ni Camarines Sur Governor Migz Villafuerte asin kinoronahan komo Bb. Pilipinas Universe kan nakaaging Abril 30.
