Balik patrabaho na sa proyekto kan Plaza Quezon pagkatapos kan Peñafrancia Festival, bilang parte kan pagpapadagos kan mga planong piglatag para sa renovation kan plaza.
Sa paghampang sa mga Kagawad kan Media ni Allen Reondanga, Head, Department of Culture, Heritage and the Art, sinaysay kaini na an paghirahay kan mga pavers sa Plaza Quezon asin Plaza Rizal an ppupunan, magkakaigwa man nin budget tanganing isasagibo an mga planong improvements sa masunod na taon.
Magkakaigwa man nin iskultura o installation na masaysay kan historya kan ciudad. Ini an may katuyuhan na magin mas madali para sa mga residente asin bisita na masabutan an kasaysayan sa paagi nin sarong visual presentation.
Dugang pa ni Reondanga na parte man kan disenyo iyo an pagpahiwas kan atop asin paggamit nin mga arkitektural na elemento na matao nin sadiring identidad sa plaza.
Obheto kan proyekto na magin mas recreational asin family-friendly an Plaza Quezon, kasabay kan pagsierto na an aktwal na konstruksyon susog sa aprobadong disenyo asin standards kan gobyerno kan ciudad nin Naga.
