(UPDATE) NAGA CITY- Kinumpirmar ngunian kan Philippine National Police-Anti Kidnapping Group (PNP-AKG) na lima hasta sa walong persona pa an saindang pigsasairaraom sa manhunt operation na miyembro man suboot kan kidnap for ransom group na nag-o-operar sa parte kan Calabarzon.
Sa ekslusibong entrevista kan Bombo Radyo Naga ki PS/Supt. Jose Dueñas, Chief of Staff kan PNP-AKG, sinaysay kaini na walong indibidwal an yaon sa likod kan pag-kidnap sa biktima na si Rolando Arguelles sa Candelaria, Quezon asin lima na mga suspek pa sana an saindang na-neutralize.
Apwera sa mga indibidwal na pigkokonektar sa nasambitang grupo, mahigot man suboot na pigbabantayan kan PNP-AKG an nagkakapira pang mga pulis na posibleng imbwelto man sa mga kidnap for ransom activities.
Enot kaini, kinumpirmar ni Dueñas na haloy nang imbwelto sa iligal na aktibidad si SPO2 Leo Pamonag, an pulis na nagseserbi suboot na lider kan mga tao na nag-kidnap ki Arguelles sa probinsya nin Quezon.
Nagseserbi man suboot na protektor si Pamonag sa mga iligal na aktibidad kan nasambitang grupo asin ini man an nagtatao kan mga uniporme na ginagamit kan mga ini.
