NAGA CITY – Nag-activate an Philippina National Police (PNP)- Bicol kan saindang Regional Standby Support Force (RSSF) na masimbag sa mga sitwasyon nin emerhensya huli sa padagos na naeeksperyensiyahan na pag-uran na dara kan mga low-pressure areas asin an southwest monsoon (Habagat) padagos na nakakaapektar sa nagkapirang parte kan Bicol Region.
An Police Regional Office 5 (PRO5), sa paagi kan saindang Critical Incident Management Committee, mahiwas na nakikipagkoordinar sa Office of Civil Defense (OCD), Local Government Units (LGUs), asin iba pang mga manonongdan na ahensya tanganing mabantayan an nagbabagong sitwasyon asin masiguro an marikas na pag-deploy kan mga personahes asin resources kun saen kinakaipuhan.
Mientrastanto, tanganing orog na mapakusog an kaaraman kan publiko, an PRO 5 nagpalakop nin mga social media advisories, na nag-eenkaminar sa mga residente sa mga hababang lugar asin landslide-prone areas na tulos na mag-ebakwar kun kinakaipuhan asin bantayan an mga update gikan sa lehitimong mga pinagkukuanan kan gobyerno.
Pig-abisuhan man an publiko na mag-dial sa emergency hotline 911 para sa tulos na rescue o asistensya.
