Pig-enkaminar kan PNP-Bicol an gabos na mga media practitioners na i-report an narereseber na pananakot sa seguridad, intimidation o harassment mantang nagco-cover kan May 12 elections.
Sigun ki PRO-5 Director Brig. Gen. Andre Dizon, an saindang preparasyon sa seguridad an nakasentro sa pagproteher sa publiko, mga kandidato asin media practitioners sa panahon kan eleksyon.
Pigtawan duon kan opisyal na maski mayo pa man narereseber saindang hepatura dapit sa mga election-related threats sa mga kagawad kan media dagos-dagos pa man giraray an saindang monitoring asin pagbabantay tanganing mayong magbungkaras na problema.
Katakod digde, pig-enkaminar ni Dizon an mga media practitioners an ireport direkta sa saindang mga lokal na police stations enkaso maka-eksperyensiya kaini.
An mga public information officers kan kada istasyon puon provincial hasta regional levels an maserberng primerong contact para sa media security.
An reactivation kan programa na ini an nagpapahiling sa commitment kan PNP para sa marhay na kapalibutan para sa mga journalists tanganing magibo man ninda an saindang responsablidad na mayong takot.
Mientrastanto, dagos-dagos an pigkukundusir na semanahang monitoring kan threats, intimidation, asin harassment kontra sa mga media practitioners sa irarom kan Media Security Vanguards initiative na piglunsar kan January 2022.
An inisyatibang ini an pig-implementar sa pakikipag-kolaborasyon sa manlaen-laen na key institutions kabali na an Presidential Task Force on Media Security, Department of Justice, Department of the Interior and Local Government asin Commission on Elections
