PREPARADO na an Ocampo Municipal Police Station sa traffic asin security plan para sa mga nakatalaan parada asin iba pang aktibidad na konektado sa pagselebrar kan kapiestahan kan banwaan ngunian na Agosto.
Sigun ki PMajor Bernardo Peñero, Chief of Police kan Ocampo MPS, nakaposisyon na an saindang mga personnel tanganing pamayuhan an dalagan kan trapiko asin malikayan an matinding trapik sa mga tinampo huli sa dakulang selebrasyon.
Kabali sa mga nakatakdang aktibidad an mga parada sa Agosto 16 asin 18, na pinaglalaoman na makawsa nin paramientras gabat kan trapiko sa mga parte kan Poblacion.
Linalaoman na magkakaigwa nin congestion mantang nag-aagi an mga parada, kun kaya kahagadan kan opisyal sa mga motorista, byahero asin residentes an saindang pag-intindi asin pakikipagkooperar sa mga traffic personnel.
Sa maabot na Agosto 18, sinabi ni Peñero na ikukundusir an “Himuloan Festival” asin bako ining regular na parada, huli ta saro ining aktibidad na kun sain makikilahok an mga barangay pasiring sa saindang patron na si Saint Bernard.
Huli digdi, paramientras na isasarado an ibang parte kan nagkapirang tinampo tanganing tawan dalan an aktibidad asin mamantiner na ligtas an mga partisipantes, deboto asin iba pang residente.
Sigun ki Peñero, pansamantala sana an road closures asin liwat na ibabalik an normal na dalagan kan trapiko makalihis an mga aktibidad.
Nakaantabay na an Ocampo PNP bandang alas sais kan aga, mantang linalaoman na mapoon an pagpoon kan mga parada bandang alas siyete nin aga.
Kinakarkulong ma-abot nin sarong oras an traffic management operations, depende sa aktuwal na hiro kan mga parada asin pakadakul kan mga sasakyan na maagi sa lugar.
Apwera sa traffic management, sinabi ni Peñero na igwa na sindang nakahandang security plan para sa kada aldaw kan mga aktibidad.
Kabali man sa planong ini an koordinasyon sa Provincial Police Office tanganing masierto an seguridad sa bilog na selebrasyon.
Hinagad kan Ocampo PNP sa publiko an pakikipagtabangan sa mga awtoridad, pagsunod sa mga ipapautob na traffic rerouting asin pansamantalang road closures asin pagtagama nin dagdag na oras sa pagbiyahe.
Sigun ki Peñero, importante an pag-intindi kan publiko tanganing magin marhay asin ligtas an pagselebrar kan kapiestahan kan banwaan.
Mientrastanto, pigsierto kan Ocampo PNP na padagos na nakaantabay an mga ini hasta matapos an mga aktibidad tanganing madaling masimbagan an ano man na problema sa trapiko asin asin mamantiner an siguridad kan kagabsan.
