NAGA CITY – Nagdugang na nin duwang byahe an tren na byaheng Naga-Legazpi.
Sa nagin paghampang sa mga kagawad kan media ni Naga City Councilor Joe Perez, sinaysay kaini na posibleng pigdugangan an byahe huli sa pagkakaigwa na nin demand. Dugang pa kaini na posibleng sa panahon kan Penafrancia Fiesta an madugangan pa an byahe enkaso igwa pa nin mga available coaches.
Mawot man kan konsehal na magin matrayumpo an byahe na ini huli ta dakula an magigin benipisyo kaini sa syudad nin Naga magin sa Legazpi.
Magigin dalan man ini tanganing mas orog na mag-uswag an ekonomiya kan duwang syudad magin an turismo kan mga ini.
Dugang pa ni Perez, mas salbado an paglunad sa tren kumparar sa iba pang mode of transportation na urualdaw an nakakapagrehistro nin mga aksidente.
Apwera pa digdi, enkaso na magin marhay an dalagan kaini posibleng hidalion na kan national government an pagpapadalagan kan tren gikan sa Metro Manila pasiring digdi sa Bicol o sa syudad nin Naga.
Makakatabang man ini tanganing mapagian an daloy kan trapiko sa mga tinampo.
Pinaglalapigotan man ngunyan an pagpapakarhay kan Naga Airport huli ta dakula an maiitabang kaini na makaguno pa nin mas kadakol pang investors asin mapaparekas man kaini an pagbyahe kan mga pasahero na dae nag-iisip kun igwa sinda nin malulunadan pagbwelta sa Metro Manila.
