Liwat na pinabisto sa bilog na kinaban an tibay kan mga Pinoy athletes.
Ini an huli naman sa solidong suporta kan Philippine Olympic (POC) sa irarom kan pagmanehar ni President Abraham ‘Bambol’ Tolentino.
Sa kabilugang 22 national athletes na ipinadara kan POC sa nakalihis na ika-33 edisyon kan Olympic Games sa Paris, France tolo an naipuling medalya.
Nangengenot na digde an duwang gintong medalya ni gymnast Carlos Edriel Yulo sa men’s floor exercise asin vault competitions siringman an tig-sarong tanso ninda Pinay boxers Nesthy Petecio asin Aira Villegas sa women’s featherweight asin flyweight division.
Minalas sa saindang mga events sinda pole vaulter EJ Obiena, boxers Eumir Marcial, Carlo Paalam asin Hergie Bacyadan, fencer Samantha Catantan, gymnasts Aleah Finnegan asin Emma Malabuyo, golfers Bianca Pagdanganan asin Dottie Ardina, judoka Kiyomi Watanabe, rower Joanie Delgaco, swimmers Kayla Sanchez asin Jarod Hatch siringman an weightlifters na si John Ceniza asin Elreen Ando magin an tracksters na si John Cabang asin Lauren Hoffman.
Kumpiyansa si Tolentino na mas kadakol pang medalya an makokolektar kan mga Pinoy athletes sa mga maabot na international tournaments ngunyan na 2025 pasiring sa 2028 Olympics sa Los Angeles, USA.
