Nagpakol na sa P34.099 trillion an kabilogang yaman kan financial system kan Pilipinas, basado sa preliminary data kan Bangko Sentral ng Pilipinas (BSP) hasta Mayo kan taong 2025.
Mas halangkaw ini nin 6.16% kumparar sa P32.119 trilyon kan parehong bulan kan nakalihis na taon.
Basado pa sa BSP an P28.228 trillion o 82.78% an gikan sa mga bangko, mantang an natatadang P5.871 trillion (17.22%) an kapot kan mga nonbank financial institutions.
Universal asin commercial banks (UKBs) an may pinakahalangkaw na parte sa resources kan mga bangko, na may kabilogang P26.202 trilyon —katampad kan 92.82% kan kabilogang yaman kan banking sector.
Naglangkaw ini nin 5.65% puon kan Mayo 2024.
Mientrastanto, an mga nonbank financial institutions an igwa nin kabilogang assets na P5.871 trillion hasta Disyembre 2024, asin naglangkaw nin 3.80%.
Saklaw kan nonbank sector an mga investment houses, financing asin investment companies, pawnshops, NSSLAs, pati na man an mga institusyong siring kan SSS, GSIS, asin mga insurance companies, kabali an pirang korporasyon kan gobyernop siring kan PhilGuarantee asin Small Business Corporation.
