Nagpahiling nin bahagyang pagrahay sa saiyang baga an chest x-ray ni Pope Francis mantang ini ay nagpaparahay gikan sa limang semanang pagtitinir kaini sa ospital, sinabi kan Vatican kan nakalihis na Martes, Abril 1.
Nagluwas nin Gemelli Hospital sa Rome si Pope Francis kan Marso 23 pagkatapos kan pagtitinir kun saen sinabi kan mga doktor na haros duwang beses na ining garu magadan, nagbalik sa Vatican para sa pagpaparahay kan dae mababa sa duwang bulan.
Sinabi kan Vatican press office na an chest X-ray na isinagibo sa nakalihis na aldaw an nagkumpirmar sa bahagyang pagrahay sa saiyang pulmonary infection.
Nagrahay man an saiyang motor skills, boses asin paghangos bagaman padagos an paggamit kaini kan oxygen sa paagi kan cannula, pwede ining halion kan Santo Papa nin panandalian.
Nagtitinir na nasa Santa Martha guesthouse an Santo Papa na nakikiparte man sa misa kada aga sa kapilya sa ikaduwang palapag kun saen ini naka istar magpuon kan magin lider kan nasa 1.4 bilyong Katoliko sa kinaban kan nakalihis na Marso 2013.
Mayo ining mga bisita apwera sa saiyang mga doktor asin mga pinakaharani na kaibahan, sinabi kan Vatican asin pigdugang na an saiyang moral ay nagtitinir na marahay man.
