Pigtawan-duon kan sarong ekonomista na dawa nagbaba an poverty rate sa Pilipinas kan 2025, dae pa man giraray ini lubos na nagpapahiling kan tunay na kamugtakan kan mga Pilipino na tios.
Sa intrevista kan Bombo Radyo Naga kay Dr. Emmanuel Onsay, Partido State University Assistant Professor | Economist, Certified Public Accountant, sinaysay kaini na an presenteng lakdang sa katiosan nakabase sana sa kita asin nakabase sa itinalaan na poverty threshold na ₱14,634 kada bulan para sa sarong pamilya na may limang miyembro.
Hababa suboot ini kun ikukumpara sa aktwal na gastos kan mga pamilya.
An inflation, presyo kan mga barakalon, minimum wage, salud, edukasyon asin access sa mga pundamental na serbisyo dapat man na konsideraron tanganing magin mas realistiko an pagsukol kan katiosan.
Tinawang-duon ni Onsay na importante an paggamit nin multidimensional na paagi sa pagsukol kan katiosan tanganing mas masimbagan kan gobyerno an tunay na pangangaipo kan mga Pilipino.
