Pighurot ni Kamanggagawa Party-list Representative Elijah “Eli” San Fernando na mapadusahan an public relations (PR) asin advertising agencies siringman an mga artista na padagos na nagpo-promote nin online gambling.
Apwera digde, pinapahali man ni San Fernando an mga darakulang billboard asin advertisement sa social media asin telebisyon mapadapit sa online gambling.
Sigun ki San Fernando, mayong saysay an paglilinig nin payment channels kun dagos-dagos pa man na ini-engganyar an publiko na magsugal.
Paliwanag ni San Fernando, kun artista o influencer an nag-eendorso, mapadara ini nin salang mensahe na an pagsusugal an sarong simpleng libangan sana, dawa na an totoo, winawasak na kaini an mga buhay asin man pamilya.
Hurot pa ni San Fernando, an mayong habas na promotion kan e-sugal an dae na dapat gibuhong normal sa mass media o digital media, orog na kun an target an kajovenan asin man vulnerable sector.
