NAGA CITY-Nagpapadagos ngonyan sa ciudad nin Naga an sarong prayer rally kan mga tagasuporta ni Vice President Leni Robredo katakod kan kinakahampang kaining electoral protest na pigsangat ni dating Senador Bongbong Marcos.
Alas-4:30 subago kan ikondusir an sarong banal na misa sa Naga Metropolitan Cathedral na pig-atendiran kan mga opisyal kan nasambitang ciudad asin mga tagasuporta kan Bicolanang opisyal.
Makalihis an misa, nagmartsa an mga ini pasiring sa Plaza Quezon kun saen nagkaigwa nin sarong programa.
Highlight sa nasambitang prayer rally an pagtatao nin pahayag kan mga piling indibidwal hale sa manlaen laeng distrito kan probinsya nin Camarines Sur manungod sa nangyari sa saindang lugar kan May 2018 Vice Presidential race.
Sa entrevista kan Bombo Radyo Naga ki Naga City Councilor Bong Sanchez, sinaysay kaini na sa paagi kan pangadyi, maipapahiling kan mga Bicolano an pagkakasararo para suportaran si Robredo.
Hagad man ni Sanchez na magluwas an katotoohan para mapatunayan na an bise presidente an totoong nagtrayumpo sa nakaaging pirilian.
Enot kaini, nagluwas an bareta na natapyasan suboot nin 5,000 boto si Vice President Robredo makalihis na ibasura kan Presidential Electoral Tribunal (PET) an mosyon kan saindang lado manungod sa pagbilang sa mga balota na 25-percent sana an namarkahan.
Pig-uyunan kan PET an 2010 rule kun saen solamenteng 50-percent sana kan mga namarkahan na balota an bibilangon sa nagpapadagos na manual recount.
