NAGA CITY- Mayong narespondehan nin mga darakulang insidente an Philippine Red Cross Camarines Sur Chapter sa kakatapos pa sana na obserbasyon kan Semana Santa.
Sa entrevista kan Bombo Naga ki Maria Felisa Badiola, Chapter Administrator kan Philippine Red Cross Camarines Sur Chapter, sinaysay kaini na sa bilog na durasyon kan Holy Week asin sa mga aktibidad na pigkundusir na igwang kinaaraman digde, minimal na mga kaso man sana siring kan dismayo asin nagpapa BP an saindang mga nairehistro sa saindang pigbugtak na First Aid Station.
Maski mainit an panahon nalikayan man an mga mayor na mga insidente na dakulang pagpapasalamat kan saindang lado.
Katakod kaini, naka-standy an saindang ambulance sa mga lugar na tolos mahihiling kan mga tawo orog na an mga nag-iba sa procession kan nakalihis na Huwebes asin Biyernes Santo.
Mientrastanto, pigsierto man ni Badiola na ngunyan na tapos na an Holy Week magpapadagos liwat an saindang pigkukundusir na mga training asin seminars siringman an iba pang mga programa na saindang pigbubusol.
Sa ngunyan, padagos na mataong asistensiya an Philippine Red Cross Camarines Sur Chapter orog na sa mga darakulang kaganapan na pigkukundusir sa nasyon orog na sa probinsiya kan Camarines Sur.
