NAGA CITY- Puspusan naman an preparasyon na ginigibo kan Philippine Red Cross Camarines Sur Chapter para sa papaabuton na Undas 2025.
Sa entrevista kan Bombo Radyo Naga ki Maria Felisa Badiola, Chapter Administrator kan Philippine Red Cross Camarines Sur, sinaysay kaini na magkakaigwa nin deployment an saindang lado sa may parte kan eternal garden, Barangay Concepcion Pequeña siringman sa siyudad nin Iriga tanganing magtao nin asistensiya sa mga mangangaipuhan.
Sigun ki Badiola, amay pa sana nag-request naman an eternal garden sa sainda para sa dugang na tabang sa panahon kan Undas.
Katakod kaini, mapakol man sa 15 personahe kada station an saindang ide-deploy alagad madepende ini sa pangangaipuihan kan lugar.
Mientrastanto, pigsaysay pa kan opisyal na kadalasan sa saindang naca-cater sa panahon kan Undas basado naman sa saindang eksperyensiya sa mga nakalihis na taon iyo an mga pasyente na nawaran nin malay, naglangkaw an blood pressure, nalulula asin iba pang mga minor cases na maikokonsederar na karaniwan naman sa panahon kan kasiributan.
Sa ngunyan, hagad na sana kaini an matuninong asin matrayumpong pag-obserbar kan Undas ngunyan na taon.
