(UPDATE) NAGA CITY- Nagpautob na nin preemptive evacuation sa tolong barangay sa banwaan nin Buhi, Camarines Sur huli sa pagtaas kan lebel nin tubig katakod kan namamatean na raot nin panahon sa probinsya.
Ini an kinumpirmar ni Carmelita Marquez, pamayo kan Municipal Disaster Risk Reduction and Management Office (MDRRMO) sa banwaan nin Buhi sa entrevista kan Bombo Radyo Naga.
Sigon ki Marquez, nag-abot na sa haros 70% nin mga household sa barangay San Buena an nag-ebakwar makalihis na maglangkaw an lebel nin tubig sa lugar.
Apwera sa nasambitang barangay, igwa man nairehistrong mga evacuees hale sa barangay San Pascual siring man sa barangay Sta. Elena.
Mientrastanto, sigon ki Marquez, nakipagkoordinar na sinda sa MDRRMO sa banwaan nin Nabua siring man sa ciudad nin Iriga katakod kan posibleng paglangkaw kan lebel nin tubig sa mga low lying areas sa nasambitang mga lugar makalihis an pag-overflow kan flood control structure kan National Irrigation Administration (NIA) na yaon sa boundary kan barangay Sta. Clara asin barangay Salvacion sa Buhi.
Pigsierto man kan MDRRMO-Buhi na mahigot an ginigibo nindang monitoring sa mga landslide asin flashflood prone areas sa saindang lugar katakod kan namamateang raot nin panahon sa probinsya nin Camarines Sur.
